О вопросах впливів войны на Україні на Европу в областях обороны, енерґетікы і потравиновой безпечности їднав у понедільок председа мадярьской влады Віктор Орбан з председом Европской рады Шарлсом Мішелом. Інформовала о тім аґентура TASR. Орбан і Мішел бісідовали через відеоконференцію в рамках приправ на засіданя Европской рады, котре є скликане на конець мая. Мадярьскый премєр подля свого говорцю Берталана Гаваші знова підкреслив важность сохраніня енерґетічной безпечности свойой країны. Орбан повів Мішелови, же на мадярьскый страх в области безпечности додаваня енерґій треба найти рішіня іщі перед запроваджіньом будьякых санкцій на довоз ропы.

(Медвідь, TASR)