В суботу в Споєных штатах проходили насилности, в дослідку чого вмерла єдна жена і дакілько людей было зраненых. Стало ся так коло походу ултраправіцьовых сил в місті Шарлотсвіл. Радник америцького презідента про народну безпечность – Герберт Реймонд МекМастер в неділю выголосив пересвідчіня, же суботняйше насиля білых націоналістів в штаті Вірджінія сповнює дефініцію терорізма. МекМастер повів про америцьку телевізію ABC, же терорізмом є будьяка атака на людей з цільом выкликати страх. Коло непокоїв в америцькім місті, де проходив поход націоналістів, расістів і неонацістів, авто вразило до людей, котры протестовали проти того похода. Події в штаті Вірджінія одсудив і сам презідент Доналд Трамп, но крітіци припоминають, же Трамп высловно не спомянув ініціаторів того походу, міджі котрыма має і тверде ядро своїх воличів. На то реаґовала говоркыня Білого дому, котра про медії повіла, же Трамп барз твердо одсуджує вшыткы окремы ґрупы, котры пошырюють ненависть і ку такым належать і неонацісты ці Ку-клукс-клан. Коло робліня порядку в суботу вмерли і двоми поліцайты, котрых гелікоптера впала.
(Петро Медвідь)