Як інфрмує аґентура Рутенпрес, сербскый Републіковый штатістічный уряд публіковав далшу серію резултатів Списованя жытелів 2022. Публікованы были даны о материньскім языку, віковій штруктурі населіня і віроісповіданю. За даныма, котры были публікованы, 8 725 особ собі в Сербії записало як материньскый язык русиньскый язык. Як сьме вже інформовали скоріше, у Републіці Сербія в списованю у 2022-ім році приголосило ся ку Русинам 11 483 людей. Русинька комуніта контінуално зменшує ся уж десяткы років. В списованю з 2011-го року іщі раховала 14 246 особ. В порівнаню з минулорічныма резултатами Русины стратили понад 19 процент населіня, 2 763 особ. Што до віковой штруктуры, найвеце Русинів у Сербії є в катеґорії од 30 до 49 років. Другов найвекшов віковов ґрупов меджі Русинами є катеґорія од 65 до 84 років, а третьов катеґорія од 50 до 65 років. Дітей до 14 років мають Русины 1 280, молодеж од 15 до 29 років рахує 1 567 особ. Найвекшов реліґійов у Сербії є православє, ку котрому голосить ся 81 процент єй обывателів. Далше в країні приголосили ся католици, мусулманы, протестанты, але і членове жыдівской реліґійной громады. Атеісты творять лем 1,1 процента населіня, і як аґностік декларовало ся 0,1 процента жытелів. (ЛЕМ.ФМ, ПКФ)