Росія іщі продумать, ці зістане сіґнатарьом Договору о одкрытім небі, кедьже рішіня США одступити од нього явить ся быти дефінітівне. По понедільковім віртуалнім їднаню сіґнатарів ведженім із віденьской централы Орґанізації про безпечность і співпрацу в Европі то повів намістник російского міністра загранічных діл Серґей Рябков, інформовали аґентура Associated Press і DPA. Договор о одкрытім небі здобыв платность од 2002-го року і є сприниманый як важный інштрумент меджінародной контролі зброїня. Підписало го 35 держав світа. Америцькый презідент Доналд Трамп оголосив замір одступити од того договору 21-го мая. Офіціално бы ку тому мало дійти 22-го новембра. Трамп іщі давніше назначів, же тото рішіня бы ся дало переоцінити, покля бы Москва договор зачала знова наповно дотримовати.

(Медвідь, TASR)