Румунія не є приготовлена перевзяти піврочну презідію в Раді Европской унії, сконштатовав у понедільок презідент Клаус Іонанніс і владу вызвав одступити. Подля аґентуры Associated Press румуньскый презідент повів, же справы ся дістали мімо контролі і є треба вымінити владу. Із свойой функції минулый тыждень неочековано одступив міністер про европскы справы, котрый мав державу приготовити на презідію в Унії, яку має од 1-го януара Румунія перевзяти од Австрії. Страхы в повязаню з презідійов Букурешту в Раді Европской унії высловила кінцьом октобра і еврокомісарька Вєра Йоурова. Вказовала притім головно на проблемы з корупційов у державі.
(Медвідь, TASR)