На жадость турецького презідента Україна дала Турції список україньскых політічных арештантів увязненых в Росії. Ердоґан бы о тім списку мав побісідовати з Владиміром Путіном. Інформовала о тім в понедільок пресова аґентура УНІАН з одкликаньом ся на уповномоченого презідента Україны про вопросы крымскых Татарів Мустафу Джемілева. Джемілев в попереднім тыждню в розговорі про Радіо Свобода повів, же список пожадало турецьке Міністерство загранічных діл, но сам мав в тій справі іщі в юні бісідовати з Речепом Таїпом Ердоґаном в Турції. Ердоґан мав втогды декларовати приготовленость анґажовати ся в тім вопросі. Турція уж в минулости помогла Україні в подобній сітуації. Росія выдала Турції в році 2017 двох підпредседів парламенту крымскых Татарів – Меджісу, котрых на анектованім півострові Крым одсудили на вісем, респектівно два рокы арешту за протидержавну діялность. Турція їх втогды вычеряла за двох російскых гражданів.
(Медвідь, TASR)