Цілково 40 депутатів брітаньской Нижньой сеймовні із владной Конзерватівной партії было согласных з пидписаньом писма, в котрім выражають недовіру премєрці Тересі Мейовой – є то о вісем менше підписів, як потрібных 48 про выбратя нового веджіня. Інформовала о тім в неділю пресова аґентура DPA, з одкликаньом ся на брітаньску ґазету Sunday Times. Конзерватівна премєрка є під тиском од юновых передчасных парламентных выборів, в котрых Мейова неочековано стратила парламентну векшыну. Їй владу крітікують і за то, як ся їй веде в їднанях з Европсков унійов о брексіті. Крітіци обвинюють Мейову, же зо шестьох кол їднань о брексіті внесло ся лем мало ясного світла до цілого проходжіня одходу і до його часовых рамків.
(Петро Медвідь)