Премєр Роберт Фіцо не хоче підтримовати войну на Україні. Зато не є згодный з воєньсков ани фінанчнов підпоров країні. Повів то в понедільок в повязаню з планованым самітом Европской унії в Бруселі, котрый одбуде ся 6-го марца. Фіцо повів, же кедь Унія вырішыть приступити ку тому, жебы далше масівно фінанчно і воєньскы підтримовала Україну, може так зробити лем на білатералнім прінціпі. Словацька републіка подля премєра не вірить стратеґії „мір посередництвом силы“, бо така стратеґія вказала ся за три рокы як неуспішна. Влада подля премєра на саміті запропонує безодкладне переміря. Фіцо на пресконференції повів, же словацька влада є згодна з підниманьом обороныспособности Европской унії і Европы як цілку. Фіцо хоче на саміті так само жадати обновліня транспорту ґазу через Україну.

(Медвідь, TASR)