В пятніцю 13-го юна 2025-го року одкрыло ся засіданя XVIII. Світового конґресу Русинів (СКР) в румуньскій Бухаресті. Русиньскы делеґації із членьскых держав СКР почали сходити ся до столиці Румунії вже од середы. Тогорічне засіданя СКР є выняткове тым, же делеґатів привітали на їх засіданя просторы Палаца Парламенту. Орґанізатором тогорічного конґресу є Културне товариство Русинів Румунії – членьска орґанізація СКР, котру веде Ґеорґій Фірцак. В пятніцю пополідне буде проходити засіданя XII. Світового форуму русиньской молодежи. Проґрам є напланованый аж до вечурных годин. Делеґаты днесь выслухають справы председы СКР, Ревізной рады, будуть чути о діятельности членьскых орґанізацій за послідні два рокы, ці справы председів конґресовых комісій. В суботу буде XVIII. Світовый конґрес Русинів продовжовати другым пленарным засіданьом. В тот день буде выберати ся і новый склад Світовой рады Русинів а буде проходити і вольба председы СКР. Почас другого пленарного засіданя буде так само прията резолуція.

Фото: Лем.фм 

(Лем.фм, Шутіова)