В суботу 14-го юна 2025-го року продовжовав XVIII. Світовый конґрес Русинів у Бухаресті своїм другым пленарным засіданьом. Делеґаты схвалили склад Світовой рады Русинів і выбрали председу на далшый дворічный період. На другім пленарнім засіданню Світового конгресу Русинів (СКР) діскутовали о можных змінах в Штатуті СКР, абы дозволити будь-якому делегатові кандидовати на місце председы, і тыж вопрос  приїманя новых членів. Наконець договорили ся, же буде створена комісія про приправу тых змін. На засіданю тыж засідало п’ять конгресовых комісій: Комісія про освіту і язык, Комісія про културу, Комісія про історію, Комісія про масмедії і выдавательство, а Комісія про турістіку і ґранты, котры інформували про обговорены темы і планы на дальшый дворічний період. Делегації выбрали своїх представників до Світовой рады Русинів, котра буде діяти з двома новыма членами: Любоміром Медєші та Яном Чопіком. Штефана Лявинця знову обрали за председу СКР на дальшы два рокы. Георгія Фірцака обрали за заступникa председы. Наступный, XIX. Світовий конгрес Русинів одбуде ся в Мадярьску. На конґресі знову быв потвердженый Владімір Протівняк секретарьом СКР і Петро Медвідь за прес-секретаря. На кінцю делеґаты XVIII. Світового конґресу прияли резолуцію і узнесіня. В резолуції СКР знова суть пункты, котры дотуляють ся вызнаня Русинів на Україні, і ґарантованя їх прав. Конґрес так само жадать, жебы Полща вызнала такзвану Акцію Вісла, в рамках котрой были насилно выселены Русины з Лемковины, за незаконну. Джерело фотоґрафії: ЛЕМ.ФМ/Facebook. (Пкф, ЛЕМ.ФМ)