Міністерство загранічных дїл США в середу ознамило, же штуденты зо заграніча можуть зась жадати о вступны віза до США. Условіём але є, жебы мали свої профілы на соціалных сїтях наставлены як верейны а могли так быти допeреду сконтролёваны. В інтернім усмернїню засланім конзуларным урядником міністерство увело, же бы мали давати позор на актівіту, прыспівкы а справы, котры выказують ,, будьякы знамкы неприятельства вочі обчанім, културі, владї, інштітуціям або основным прінціпам Споєных штатів“. Новы жадателї, котры не будуть хотїти мати наставлены свої конта на соціалных сїтях як верейны, бы могли быти замєтнуты. Їх постой бы міг быти подля міністерства знаком того, же ся намагають обыйти тоту пожадавку або скрыти свою онлайн актівіту.

(TASR, Шутіова)