Україна говорила зо Споєныма штатами о можности дочасно одложыти надходяче коло тристранных роковань з Росіёв о примірю а змінї дїяня позераючі на ескалуючій іраньскый конфлікт, увів україньскый презідент Володимир Зеленьскый у четвер. TASR o тім інформує подля справы аґентуры Reuters. Нове коло роковань ся подля передбежных інформацій мало одбыти в Абу Забі, но Споєны арабскы еміраты ся стали цїлём найновішых іраньскых атаків. Зеленьскый увів, же є отвореный змінї місця, наприклад до Турції ці Швайцарії. ,,Далше тристранне рокованя Україны, США і Росії были напланованы на 5. аж 9. марца, в одношіню од світового дїяня. В сучасности ту але маме далшу войну на Близкім выходї,“ написав Зеленьскый на платформі X. „Говорили сьме з америцкым боком, кедьже они позывать Україну і Росію на стрїчі, о можности змінити місце дїяня а посунути стрїчу про войну на Близкім выходї,“ пояснив презідент. Зась крітіковав пожадавку Москвы, жебы ся Україна стягла з Донецькой области котру Росія не окупує.

(TASR, Шутіова)