Платы в школстві не суть проблемом цїлого Словеньска. Найвеце ся тот проблем явить головно в Братїславскім краю а в головнім містї Словеньска. Увів то аналітік Інштітуту економічных і сполоченьскых аналіз Роберт Хованцуляк, котрый твердить, же платы в школстві ся мають рішити реґіонално. ,,Скуточны проблемы при платох суть головно в братїславскых окресох, де платы учітелїв не досягують ани містну прємерну мзду. Лем про порівнаня – в Пряшівскім краю мають учітеле скоро 160 процент містной прємерной мзды,“ повів про TASR. Як дале доповнив, рїшити то треба наприклад через пріплаткы ку бываню про учітелїв з дорогых і богатых окресів.

(TASR, Шутіова)