Новелов закона о фінанчній підпорі церькві і реліґійной общності бы мала принести реґулацію заробітків священиків, тыж дати средства на обнову реліґійных центер і розшырити можности поужытя штатного вкладу, повіла міністерка културы СР Любіца Лашакова. „Днешній середній заробіток священиків є на уровні 480 евр, з той причины реґулація є в тім припаді насправды потрібна, так само як і средства на зліпшіня центер церькви, кідже резіденції єпархій і домы священиків суть часто в злім ставі. Притім іде і о резіденції, котры суть културныма памятками, до реконштрукцій котрых є потрібно підходити барз чутливо,“ конкретізовала міністерка културы, підчеркуючі, же дана новелізація управує став, котрый ся одвивать од закона приятого іщі в року 1949. (TASR, Пкф)