До шпыталів прхидять новы постелі. В братіславскім шпыталю на Антолскій уліці передали в понедільок 70 новых. Премєр Петер Пеллеґріні із той нагоды повів, же є важным робити вшытко про конфорт паціента, котрый по яскостнім закроку заслужыть собі добру реконвалесценцію. Цілково шпыталі дістануть 8100 новых постелей. „Обіцяли сьме з пані міністерков, же до нашых шпыталів прибуде дакілько тісяч новых постелей і обміниме так ліжка, котры мають часто 20 – 30 років. Многы з них вже не мають тоты параметры, котры бы мали мати. Днесь в антолскім шпыталю сьте свідками того, як ся довезли першы постелі, котры уж суть хоснованы паціентами. Мали сьме можливость говорити з паціентами, котры позітівну зміну вітають. Барз собі то хвалить і здравотницькый персонал,“ повів вчера премєр. Председа влады собі думать, же штохвіля будеме свідками якостной зміны в словацькім здравотницьтві. Авізовав далшы великы реконштрукції, наприклад реконштрукцію Дітячого факултного шпыталю в Баньскій Быстріці, што буде плачене із еврофондув, із державного бюдежу підуть грошы на реконштрукцію Універзітного шпыталю в Баньскій Быстріці ці ружіновскый шпыталь. За його словами приготовлюють ся і векшы крокы, як сатіскафція словацькых шпыталів.
(Медвідь, TASR)
Фото: TASR