Пропозіції законів о Словацькій телевізії і Словацькім радію затля не суть в плані леґіслатівных задач влады. Міністерство културы посянило, же причінов є актуалне діяня в парламенті, котре знеможнює стигнути передложыти леґіслатівны пропозіції в авізованім періоді. Подля Петры Бачіньской, директоркы Комунікачного одділіня резорту културы, не є жаднов проблемов, жебы пропозіції законів міністерство передложыло в іншім терміні. Законы, котры мали повнити замір кабінету з проґрамового выголошіня о створіню правного і економічного рамку розділіня RTVS, мало міністерство передложыти на засіданя влады в марці. Но при схвальованю леґіслатівного плану влады в четверь 1-го фебруара міністерка културы Мартіна Шімковічова пожадала о выпущіня предметных задач на марец.

(Медвідь, TASR)