Ексмінітер фінанцій Петер Кажімір є од 1-го юна у функції ґубернатора Народной банкы Словакії. До функції го пришов у понедільок вовести премєр Петер Пеллеґріні. Кажімір повів, же ся хоче заміряти на діґіталізацію служеб плачіня, хоче продовжовати в кроках заміряных на охорону фінанчных спотребителів, але і на зліпшіня аналітічной діялности НБС. „Зроблю вшытко, жебы єм поміг НБС приготовити ся на нову добу. Є повязана з новыма діґіталныма платформами плачіня, новыма способами фунґованя обходных моделів у фінанчнім секторі. На першім місці все была і буде стабіліта фінанчного сектора,“ повів новый ґубернатор. За важну справу Кажімір спринимать і підниманя фінанчной ґрамотности на Словакії. Такой в першых днях го чекають загранічны робочі драгы, піде до Вілнюсу на міморядне засіданя Рады ґубернаторів централных банк, навщівить Австрійску централну банку, але і бюро Европской централной банкы.

(Медвідь, TASR)