x

Медіци, котры одыйдуть роботи до заграніча, бы мали платити за школу

00

Словакія є продуцентом лікарів про Европску унію і світ і є треба роздумовати над віртуалным рахунком за штудіюм медицины. Покля бы абсолвент одышов робити до заграніча і не вернув бы ся до 5-ох років, його рахунок бы став реалным і мусив бы го заплатити. Вчера то выголосила опозічна депутатка із SaS Яна Циґанікова. Віртуалный рахунок бы ся вытворив в сумі штудія абсолвента і покля бы ся не вернув, вертав бы фінанції до словацького бюджету. „Не видить ся нам фер, же гражданы Словакії, котрых не має хто лічіти, платять штудіюм лікарів, котры наконець лічать в загранічу. Про лікарів выштудованых і роблячіх на Словакії бы ся нич не змінило. Штудіюм бы было надалше безплатне. Сітуація бы ся змінила лем про тых, котры бы в загранічю вырішыли зістати, наприклад і з причіны высшых платів,“ повіла депутатка на пресконференції. Єден штудент подля Циґаніковой стоїть 13.300 евр. Подля Центра науково- технічных інформацій Словацькой републікы од 2010-го до 2016-го року выштудовало на Словакії 5386 лікарів, включно загранічных штудентів. До практікы в загранічу зо словацькым діпломом пришло довєдна 2572 лікарів. То подля депутаткы ясно вказує, же Словакія є продуцентом лікарів про Унію і світ.
(Медвідь, TASR)