В Пряшові ся в просторах СНМ – Музея русиньской културы в пятніцю, 17-го октобра 2025 р., одбыло 39-те засіданя Округлого стола Русинів Словакії (ОСРС). Платформа, в котрій суть здружены русиньскы орґанізації, інштітуції але і незалежны актівісты, зробила оцінку роботы за попередній період, і выбрала собі нове веджіня. ОСРС поведе Мілан Ян Піліп, котрый вычеряв так Петра Штефаняка по його успішнім другім мандаті. Ключовов новинков є выменуваня Яна Коцака за русиньского амбасадора при Пряшівскім самосправнім краю (ПСК) і то декретом од председы ПСК Мілана Маєрьского. Амбасадор Коцак є одповідный за кооперацію при підпорі і розвитку русиньской комуніты ПСК в областях транспорту, културы і школства. На засіданю тыж была схвалена згода Ґрекокатолицькой церькви на хоснованя русиньского перекладу Літурґії св. Йоана Златоустого, чім ся русиньскый язык став повноцінным літурґічным языком. На концю засіданя собі ОСРС выбрало нове веджіня. Слідуючі три рокы поведе платформу Мілан Ян Піліп, догворочный русиньскый актівіста, котрый стояв при основаню ОСРС. Тот потвердив, же хоче далше продовжовати в роботі свого попередника, і посилньовати позіцію ОСРС як релевантного представителя Русинів на Словакії, але і поставліня русиньской народностной меншыны обще. В презідії будуть в слідуючім періоді Зденка Цітрякова за індівідуалных членів, Петро Штефаняк за колектівных членів, Петро Медвідь як член Рады влады СР про народностны меншыны і єдночасно прес-секретарь ОСРС, Александер Грічко і Йосиф Бадида за комсії при ОСРС, а Мафтей Допіряк, котрый є секретарьом ОСРС. (ЛЕМ.ФМ, Пкф)