Поліцайты од днешнього дня зачали з інтензівныма контролями на внутрішніх границях. Замірюють ся на дотримуваня карантенных повинности по вступі на теріторію Словакії. Дакотры меншы, менше важны місця призначены на перекрочуваня внутрішніх границь ся заперли. Выходить то з нового алерт сістему, котрым ся керують опатріня на границях. Словакія є тот тыждень вчленена до оранжовой фазы. Выїмку з контроль буде мати накладный транспорт. “ Контролі ся будуть выконавати тыж у вытіпованых влакох і на влаковых станіцях. Інтензівны контролі ся од днешнього дня выконавають і на летісках,“ доповнила говоркыня Презідія Поліцайного збору Деніса Бардіова. Поліцайный збор выконавать контролі з подпоров Озброєных сил СР. (TASR, Pkf)