Політічны партії, котры досягли хоч 3 % голосів у вольбах до Народной рады (НР) СР в року 2023, достануть в тім році скоро 14,3 міліона евр. Цілком за штитірочный волебный перійод розділить ся понад 92 міліонів евр. Найвеце достане Smer-SD  (3,6 міліона), пак Progresívne Slovensko  (2,8 міліона) і Hlas-SD (2,4 міліона). Міністерство внутра пропонує зміну, жебы фінанчны вклады доставали лем партії, котры ся достали до парламенту (над 5 %), што має мотівовати партії і забезпечіти фінанцованя лем партіям з реалным впливом. Transparency International Slovensko (ТІС) пак варує, же то може згоршыти транспарентность і принутити меншы партії ку похыбному фінанцованю. (TASR, Pkf)