На боротьбу проти фашізма вызвала в понедільок презідентка Словацькой републікы Зузана Чапутова, котра взяла участь на святочній церемонії в бывшім націстічнім концентрачнім лаґрі Аушвіц-Біркенау з нагоды 75-ой рінчіці його освободжіня. За словами презіденткы є фашізм іщі все жывый і у нас, в нашій сполочности, і зато думать, же є барз важным, жебы сполочныма силами сьме робили вшытко, жебы не дістав ся ку властям. Святочна церемонія в бывшім концентрачнім лаґрі зачала пополідне і брали на ній участь членове кральовскых родин, презіденты і премєры з майже 60-ох держав. Іщі перед зачатком церемонії веце як 200 людей, котры пережыли голокауст, положыли вінці ку муру смерти, де націсты почас існованя лаґру застрілили тісячі вязнів.

(Медвідь, TASR)