Презідентка СР Зузана Чапутова, котру мадярьскы владны медія называють лем як аґентку америцького фінанчника Джорджа Сороша, завтра прийде до Будапещі. Написало о тім вчера інтернетове выданя лівіцового денника Népszava, котре припоминать, же Чапутова прийде на позваня мадярьского презідента Яноша Адера. За інформаціямі аґентуры MTI першу словацьку презідентку прийме Адер з воєньскыма честями на Площадкі св. Юрая. По приятю будуть обоє презіденты їднати в Сандоровім палаці і абсолвують пресконференцію. (TASR, Пкф)