Рух OĽaNO дав пропозіцію на поліцайну іншпекцію. Тота бы мала перевірити лустрованя записів о новинарьови Янови Куціякови пів рока перед його забитьом. Інформовала о тім депутатка Народной рады Вероніка Ремішова на понедільковій пресконференції. Подля Ремішовой довіра в державу і довіра в інштітуції не дає ся обновити, покля стоїть на згнитых фундаментах і в поліції треба зробити порядок, жебы собі єй не спріватізовали даякы пріватны орґанізованы ґрупы. Ку бывшому поліцйаному презідентови Тіборови Ґашпарови, котрый мав дати Куціяка лустровати, выразив ся на бріфінґу і депутат Ґабор Ґрендел. „Тібор Ґашпар бы мав штонайскоріше одповісти на три основны вопросы. По перше, з якой причіны дав пів рока перед убийством лустровати в поліцайных датабазах інформації о Янови Куціякови? По друге, якы інформації назберала поліція пів рока перед убийством о Янови Куціякови? По третє, што з тыма інформаціями поліція далше зробила, кому їх загнала?“ Опозічны депутаты ся хотять на тоту тему звідати і міністеркы внутрішніх справ Денісы Саковой. Подля Ремішовой є важным, жебы знала одповіді на тоты вопросы. Покля міністерство крыє подобны перепоїня, метать то плане світло на цілу поліцію, думать собі депутатка.

(TASR, Mедвідь)