В неділю 11-го юна 2023-го року словацькы Русины зышли ся у Свіднику, жебы одсвятковати свій день – День Русинів Словакії. Офіціалны цілонародны святкованя тот рік проходили в місті, котре лем од марца є офіціално другым русиньскым містом в Словацькій републіці. Головный орґанізатор події, Русиньска оброда на Словеньску, тогорічны святкованя приготовив у співпраці з Містом Свідник, Піддукляньскым освітнім центром у Свіднику, і містнов молодежнов орґанізаційов Молодый Свідничан. Проґрам святковань пополідне почав на цінтері коло Ґрекокатолицькой церькви Божой мудрости, де є похованый русиньскый будитель Александер Павловіч, потім наслідувала кройова маніфестація по улічках Свідника з русиньскыма прапорами, зо співом аж до Дому културы, де продовжовав ґалапроґрам, котрый святочно одкрыли Михал Ґоріщак – заступника пріматоркы Свідника, Володимір Противняк за Русиньску оброду і Штефан Лявинець за Світовый конґрес Русинів. По приговорах і святочнім одкрытю вже наслідовав ґалапроґрам. Орґанізаторы тот рік збудовали проґрам не на професіоналных умелцях, але на дітячіх і молодежных ансамблях, котры походять з веце реґіонів. У фоає Дому културы участны могли посмотрити і малу выставу образів русиньскых малярів із збіркы Петра Микулы. Окрім офіціалных цілонародных святковань тот рік зорґанізованы были і далшы святкованя. в суботу 10-го юна проходили святкованя в Меджілабірцях, а днесь 12-го юна, коли офіціално День Русинів Словакії має своє місце в календарі, першый раз одбудуть ся святкованя і в Братіславі. (ЛЕМ.ФМ, Pkf)