Выслідкы Спысованя обывателів, домів і квартелів 2021, котры ся дотыкають народности і далшой народности, бы ся мали інтерпретовати як сучет обох народностных катеґорій поважованых за рівноцінны. Выходить то з пропозіції, котру предложыв Уряд влады СР до меджірезортного припоминкового конаня. Таку інтерпретацію запропоновав Выбор про народностны меншыны і етнічны ґрупы. Третій найвысшый поділ в рамках той інтерпретації мають з народностных меншын Русины. Ку народности ся приголосило 23.746 людей, далшых 39.810 собі єй увело як другу наросность. Цалком ся так ку русиньскій народности приголосило в списованю 63.562 oсоб, што представлять 1,2 процентный поділ. На закладі выслідків списованя і їх інтерпретації подля народности і далшой народности ся список сел, в котрых жытелі СР, якы належать ку народностній меншыні, творять найменше 15 процент, підвышыв о 160. Конкретно о 5 сел з мадярьсков меншынов, 88 сел з русиньсков, 66 з ромсков і єдну з німецьков народностнов меншынов. Подля закона мають членове народностных меншын в селах, де творять по двох по собі  списованях найменше 15 процент обывателів, право хосновати материньскый язык в уряднім контакті. Матеріал мать быти підкладом на наряджіня влады, актуалізуючій список сел, котрых ся дотулять законне установліня. (А. Кузмякова)