К продовжіню економічных санкцій проти Росії у звязї з найвысшов ескалаціов напятости меджі Росіов і Укрїнов в Азовскім морл ся у четверь приїднала і Словакія. Премєр Петер Пеллеґріні іщі перед рокованём о даній темі новинарям потвердив, же Словакія проти санкціям односно Росії не піде. Говорить Петер Пеллеґріні: „Тоты заключіня, котры суть днесь пропонованы і з боку країн V4 было конштатоване, же суть выважены а ани єдна з країн не сіґналізова потребу їх даякым способом веце драматізовати. Увидиме, з чім можуть прийти дакотры лідры, котры будуть мати снагу пропоновати зміны текстів заключінь прямо в часї рокованя. Заты то авізо не маєме. Я єм декларовав доста ясно, же хоць маєме свій резервованый погляд на пособлїня санкцій, котры, відять ся, же не приносять желательный ефект. В дако трых припадах ся тоты односины іщі веце згіршують і люде одходять од роковацого стола, што є найгірше, што ся може стати. Словакія але не выбочіть з єднотной лінії і буде повностёв решпектовати і буде частёв розгоднутя цїлой ЕУ27 так як то буде пропоноване.“ Двойднёве рокованя закінчіть саміт еврозоны, на котрім выступлять і преседа Европской централной банкы Маріо Драґгі і шеф Евроґрупы Маріо Центено. Саміт бы мав высловити підпору розгоднутя о реформі тзв. тырвалого евровалу і розгоднутю о банковій унії.
(TASR, Цітрякова)
Фото: TASR/Úrad vlády