Од днешнього дня перейшли школярі другого ступіня основных школ і штуденты середніх школ на діштанчну едукацію. Навчати ся такым способом  будуть до пятниці 17-го децембра, кідь будуть мати послідній день навчаня. Од понеділька 20-го децембра ся про вшыткых школярів зачнуть рождественны вакації. З вердікту міністра школства выходить, же школска едукація не є перерушена в основных школах про школярів зо шпеціалныма выховно-едукачныма потребами і основных школах при здравотницькых інштітуціях. Так само едукація буде проходити і в середніх школах про штудентів зо шпеціалныма выховно-едукачныма потребами і реалізувати ся буде і практічне навчаня в середніх здравотницькых школах. Отворены оставають надале і першы ступіні основных школ і матерскы школы. (TASR, Pkf)