Дванадцять новинарів з РТВС дало к 31. маю выповідї. Інформовали о тім посередніцьтвом соціалной сітї, де у сполочній позіції выголосили, же одход з РТВС є вопросом професіоналіты і новинарьской чести а не суть за тым особны споры. Новый ґенералный директор і ёго манажмент подля редакторів нічів їх роботу, розбивав справодайскый тім і трестав їх за властны погляды. Меджі новінарьми, котры одходять з РТВС суть окрем іншых Зузана Ковачіч Ганзелова, редакторы Павол Каліньскый, Філіп Мініх, брусельска новинарька Даньєла Гайчакова ці Луція Освалдова. Зо слов представителїв РТВС їх оголошеный одход части справодайского тіму мерзить, але решпектують їх слободне розгоднутя. Протягом двоймісячной выповідной добы ся веджіня справодайства буде надале намыгати терпезливо їм высвітлёвати годноты верейноправности. Говоркыня РТВС Еріка Руснакова убезпечіла верейность, же ход цїлой РТВС, як і секції справодайства і публіцістікы є повногоднотно забезпеченый і надале. Подля презідента СР Андрія Кіску суть выповідї редакторів далшов злов справов про якость верейнопраного справодайства. Напятов сітуаціов в РТВС бы ся подля Кіску мала занимати владна коаліція, прислушный парламентный выбор і Рада РТВС. Выядрїня редакторів о неадекватнім засїгованю манажменту до роботы новинарїв поважує презідент за міморяднї важны.
(TASR, Цітрякова)