Драстічна реакція поліції проти леґалній штудентьскій демонштрації 17-новембра 1989-го року в Празі  вела за пару тыжднів ку паду комуністічной сістемы в тогдышній Чехословакії. Тота ненасилна зміна знама як Ніжна револуція або і Баршанова револуція є прічінов, про котру ся 17-ый новембер став штатным святом, званым День боя за слободу і демокрацію. 17-ый новембер є уж  од Другой світовой войны званый і як День штудентів. В Празі ся 28-го октобра 1939-го року одбыла демонштрація штудентів з нагоды 21 років од взнику Чехословацькой републікы. Єдночасно ся стала і протестом проти націстічній окупації Чех, Моравы і Слезка. На мітінґу быв забитый пекарьскый учень Вацлав Седлачек і тяжко поранили штудента медицины Яна Оплетала. В тім часі 24-рочный высокошколак Оплетал 11-го новембра на пораніня умер і 17-го новембра нарядив рішскый протектор запертя чеськых высокых школ і інтернатів. Тот день ся од року 1941 припоминать як Меджінародный день штуденства. (TASR, Pkf)