Партія Most-Híd хоче їднати о передчасных парламентных выборах із SNS. Премєр Роберт Фіцо є проти такій можливости. По засіданю Републіковой рады партії то повів в пізных вечорных годинах на бріфінґу председа Бела Буґар. „Републікова рада Most-Híd повірює веджіня партії, на чолі з председом їднати з коалічныма партнерами о можливостях передчасных парламентных выборів. Покля тоты їднаня будуть неуспішны, партія Most-Híd выступить з коаліції. Републікова рада єдночасно давать мандат Републіковій презідії в припаді далшого розвитку прияти рішіня без потребы скликати їднаня Републіковой рады,“ повів на пресконференції Буґар. Подля Буґара сучасну сітуацію можуть вырішыти лем передчасны выборы. Коли бы мали быти, не уточнив, но повів, же покля прийде ку договору о пердчасных выборах, його міністры зістануть у владі. Буґар ся не хотів выразити ани ку тому, ці його депутаты підпорять пропозіцію на высловліня недовіры владі, з котров хоче прийти до парламенту опозіція.
(Медвідь, TASR)

Фото: TASR