Progresívne Slovensko (PS) декларує, же сполупрацю з партійов Hlas-SD одмітло повторюючо і єднозначно. Про пресаґентуру TASR то увела Тереза Мікачова з медіалного одділіня руху в реакції на вызву председови PS Міхалові Шімечкові од лідра Hnutie Slovensko Іґора Матовіча. „Сполупрацю з партійов Hlas-SD сьме одмітнули повторюючо і єднозначно. Бутьякы атакы і циґанства Іґора Матовіча, котрый ся снажыть одвести позорность од того, же знова раз поміг Робертові Фіцові, не мать змысел коментовати,“ реаґовало PS. Матовіч в неділю вызвав Шімечку, жебы вылучив хоцьяку по-волебну сполупрацю з партійов Hlas-SD. Кідь ся так не стане, рух авізує зорґанізувати на середу (1. 10.) ключову пресконференцію, котра вырiшыть будучі вольбы. Припомянув тыж, же є скоро половина волебного періоду і опозіція бы, подля нього, мала мати ясный план. (TASR, Пкф)