Новый польскый парламент выголосив контраверзно сприниманы  реформы судницьтва бывшой конзерватівной влады за протиуставны. Інформувала  о тім аґентура DPA. Зміны дотуляючі ся польской Судной рады (KRS), котры зреалізувала бывша владна партія Право і Справодливость (PiS) в роках 2018, 2021 і 2022, были одобрены “в прикрім конфлікті з уставов Польской републикы“, пише ся в тексті установліня приятого посланцями. Польща уж пару років веде з Бруселом спор у звязку зо спорныма реформами судницьтва влады PiS. Европска комісія подала проти Варшаві уж пару жалоб на Судный двір Европской унії про наміткы проти юстічной реформі. З той причіны фурт блокує Польщі черпаня міліярд евр з фонду Европской унії на обнову по пандемії. (TASR, Pkf)