Централны святкованя Дня Русинів Словакії ся 8-го юна 2025-го року вернули до Пряшова, історічного центра Русинів на Словакії. Тот праздник, схваленый Світовым конґресом Русинів в році 2009 на 12-го юна, орґанізує Русиньска оброда на Словеньску. Проґрам ся зачав при Памятнику Александра Духновіча, де ся зышли Русины з дому і зо заграніча. По заспіваню русиньской гімны „Вручанія“ привітав участных председа Русиньской оброды Мартін Караш. Зазвучала поема присвячена Духновічови і Петро Медвідь у своїм выступліню акцентовав, же вшыткы русиньскы праздникы бы ся мали зачінати при памятнику того будителя. По положіню вінців і панахіді за Духновіча ся процесія пересунула ку Театру Йонаша Заборьского. Там ся одкрыла выстава „Русины в образах“, де было выставленых 24 діл русиньскых малярів. Выстава, зреалізована дякуючі Петрови Микулови, указала богатство русиньской културы і уменя. Святкованя кулміновало Ґалапроґрамом Дня Русинів Словакії, котрый заповнив театр понад 500 людми. Проґрам модерoвала Наталія Гребікова і окрем Мартіна Караша на нім брали участь і вызначны гості, в тім чіслі посланці Пряшівского самосправного края, проф. Павло Роберт Маґочій зо Світового конґресу Русинів і далшы представителі русиньскых орґанізацій. В рамках святковань ся днесь одбыв і конкурз в декламації „Духновічів Пряшів 2025“. Далшы святкованя суть напланованы в Старій Любовні, Меджілабірцях і в Братіславі. Фото: ЛЕМ.ФМ/facebook  (ЛЕМ.ФМ, Пкф)