Културны орґанізації Пряшівского самосправного краю (ПСК) нукають в літі богатый проґрам.  Не будуть хыбити градны славности, фестівалы, дні ремесел, позорованя звізд, концерты, выставы і театралны выступліня. Наприклад Театер Александра Духновіча днесь выступить з премєров приповідкы про діти і молодеж в русиньскім языку під назвов Царь пав, а в другій половині авґуста театер завітать до сел Пряшівського краю. Як про наше радіо повіла Леа Геілова з одділіня комунікації і пропаґації Уряду, ,,многы міста і села навщівить і Піддукляньскый умелецькый людовый субор – ПУЛС“. Любовняньскый музей окрем градного музикалу нукать стрічі родин давных властників граду. В Шарішскім музею в Бардейовскых купелях будуть Дні ремесел з народнов музиков і танцями ці огляд русиньскых і шарішскых співанок.  Креатівны воркшопы орґанізує Музей модерного уміня Енді Варгола в Меджілабірцях, де в рамках формату Coffee Break можуть навщівници выпити каву з директором музея і абсолвовати коментованый огляд. (Pkf)