Заступовати інтересы малых сел хоче нова обчаньска ініціатіва, котра взникла як реакція на приправованы реформы народной справы. Обчаньске здружіня Ініціатіва малых сел (IMO) твердить, же пропонованы зміны не рефлектують реаліту жывота на селі і взникли без достаточного залучіня малых самосправ. Пресаґентуру TASR о тім інформовали з IMO. Подля здружіня творять малы села веце як половину вшыткых сел на Словакії, но їх голос при приправі змін не быв выслуханый. „Малы села творять хребет словaцького реґіону. Наперек тому ся о їх будучности рішыть без них. Кедь має взникнути реформа народной справы, мусить ся зачати слуханьом людей, котры ю денно выконавають в праксі — старостів і жытелів малых сел,“ увів основатель здружіня і староста села Баєрівці Михал Секерак. Ініціатіва реаґує на позічный документ о реформі народной справы, котрый приправило Здружіня міст і сел Словакії (ZMOS) і здружіня самосправных країв SK8. Подля IMO быв матеріал приправленый без реалного залучіня малых сел. Вызывають ZMOS, абы пояснило спосіб приправы документу і увело, з якым чіслом  сел до 500 обывателів быв тот документ консултованый. Єдночасно вызывають ZMOS, абы публічно ознамив список сел, котрым быв матеріал загнаный, список сел, котры го припомінковали, і мена авторів, котры го приправили. (TASR, Пкф)