Общество святого Йоана Крестителя выдало Ґрекокатолицькый русиньскый календарь на два тісяч вісемнадцятый рік. Його обсяг творять різны темы з церьковного і културного жывота Русинів на Словакії. Отець Ярослав Поповець, председа общества, у вступнім слові  календаря пише о трьох вызначных подіях в будучім році. Першов є 50 років од обновліня нашой Церькви, другов є ослава 200 років од основаня Пряшівского єпіскопства а третьов 1155 років од приходу славяньскых учітелів святого Кіріла і Методія на Велику Мораву, котрой частьов была і область теперішньой Словакії. Календарь собі можете купити в церькви або обїднати прямо в Обществі святого Йоана Крестителя.
(Петро Кімак-Фейко)