4-го октобра в Андрійовій проходив одпуст на праздник Покровы Пресвятой Богородіці. Із той нагоды была містным ґрекокатолицькым священиком Йосифом Шофранком посвячена репліка Ґрекокатолицькой церькви святого Лукы, котра была збудована в селі у 1738-ім році на місці, де є днесь цінтерь. Деревяна церьков згоріла у 1882-ім році. При огні зничіли ся і три дзвоны, котры посвятив втогдышній мукачівскый єпіскоп Михаіл Мануіл Ольшавскый. Вынятковость той реплікы, котрой автором є Марцел Штібріх, є в тім, же была зроблена подля єдиного існуючого образу з року 1906, котрый намальовал учітель мальованя Мірослав Рубій з Дьору.

(Медвідь, ISPA)