Надація Деревяна церьковка Габура, місто Меджілабіріці, Русиньска оброда на Словеньску і Лабірьскы Русины днесь, 5-го септембра 2022-го року о 10-ій годині зорґанізовали вызначну подію – одкрытя сохы русиньского будителя і автора русиньской гімны Александра Духновіча в ареалі Основной школы на Духновічовій уліці в Меджілабірцях. Місто Меджілабіріці  вєдно із споминаныма русиньскыма орґанізаціями перед пару роками зачало будовати свою маркетінґову значку „Меджілабірці – Головне місто Русинів“,  завдякы котрой хоче зліпшыти свій турістічный потенціал і підпорити русиньскый характер реґіону. По аплікації візуалной двоязычности (словацько-русиньскых значок, написів по місті, заведжіню выукы русиньского языка на обидвох основных школах, орґанізованю свята Дня Русинів Словеньска  (12.06.) і Світового дня Русинів (23.03.), приходять єй орґанізаторы і з іншталаціов сохы народного будителя Русинів – Александра Духновіча. Іде о соху высоку 3 метры, котрой автором є вынятковый словацькый сохарь Юрай Чутек і котру вытворив в часі 4-го рочника Сохарьского сімпозія Олены Мандіч – Шіналі, якый недавно в Габурі зорґанізовала Надація Деревяна церьковка Габура. (Pkf)