Шарішскый музей в Бардейові, котрого зряджовательом є Пряшівскый самосправный край (ПСК), почав реконштрукцію свого сканзену в Бардейовскых Купелях. Інформовало о тім Одділіня комунікації ПСК. Проєкт під назвов Музей – мій часопростор реалізує музей із польскым партнером, котрым є Музей ремесел в Кросні, в рамках проґраму Interreg Польща – Словакія 2021-2027 із бюджетом майже 4 міліоны евр. На словацькый бік граніці іде 1,9 міліона евр, найвызначнішу часть інвестіцій притім творять еврофонды, котры суть доповнены державныма фінанціями, а так само грошами з розрахунку ПСК. Проєкт в сканзені є заміряный на ставебно-технічну обнову обєктів, котры ся в нім находять. В Бардейовскых Купелях ся буде робити на 20-ох обєктах – семох хыжах, двох деревяных храмах, двох сыпанцях і дзвоніцях, ковальскій шмыкні і далшых. Реконштрукційов перейде і гоблярьска майстерня, в котрій выникне новый выставно-едукачно-презентачный простор. Закінчіня проєкту Музей – мій часопростор є наплановане на юн 2026-го року. Джерело фотоґрафії: Facebook/ЛЕМ.ФМ (ЛЕМ.ФМ, Пкф)