Насытити єдну дитину жыючу в ехтремній худобі на цілый школскый рік буде мати можность каждый біжець зо штартовного, котре є у вышкі 15,60 евр, на історічнім першім харітатівнім бігу здружіня Mary’s Meals Slovensko. Одбуде ся в суботу 28-го септембра в Татранскій Ломниці і уж теперь ся на нього приголосило вецей як стовка біжців. Про пресову аґентуру TASR то повів Віктор Порубскый, штатутар здружіня. „Меджінародній харітатівный проєкт Mary’s Meals помагать посылати худобны діти до школы там, де їм худоба і голод боронить в приступі к освіті. Проєкт давать дітям єдно їдло денні прямо в їх школі, абы немусіли од мала робити або жобрати і зо здобытов освітов мали надію выманити ся з худобы.  Mary’s Meals помагать уж выше 1,5 міліонів дітям у 18-ьох країнах світа вєдно Южного Судану, Гаіті, Індії, Камбоджі, Малаві ці Кені. Выше 80.000 добровольників, векшынов родиче дітей, там приправує їдло з локалных потравин без права на одміну,“ конкретізував Порубскый.  (TASR, Pkf)