x

День Русинів Словакії продовжує

00

Од четверга ся одбывать святкуваня Дня Русинів Словенська. Головный проґрам святкованя шак быв в Словакії напланованый на вікендовы дні. В суботу Русины ся зыйшли в просторах свого музею в Пряшові і як раз тот день быв тематічно першорядо заміряный на припомянутя сторічніці Чехословацькой републікы як державы трьох державотворных народів. О другій пополідне зачав ся проґрам святочнов академійов ку сторічніці, і одбыла ся бісіда о Русинах і ЧСР. В тот день проґрам завершыв ся промітаньом документарного філму Здружіня інтеліґенції Русинів Словеньска під назвовВ хападлах великодержав. Битва підкарпатьскых Русинів о місце в родині евроспкых народів. В неділю святкованя о третій пополідне ся зачало коло памятника Александра Духновіча. По куртім спомині на найвекшого будителя Русинів і так само по припомянутю 85-ой річніці од одкрытя того памятника в Пряшові, Русины святочным ходом центром міста перейшли до великой засідалні Окресного уряду – тзв. Білого дому, де одбув ся ґалапроґрам. В рамках нього выступили русиньскы фолкорны ґрупы, ансамблі, соловы інтерпреты. Днешній день належав 19-му річнику цілословацького конурзу в декламації русиньской поезії, прозы, духовной декламації, народного росповіданя, властной творчости і малых сценічных форм – Духновічів Пряшів 2018. Участных конкурзу, котры поступили з реґіоналных конкурзів, но і вшыткых заінтересованых выслухати собі русиньске літературне слово, привітав од девятой Великый сал русиньского театру Александра Духновіча в Пряшові. Змагали ся різны віковы катеґорії, од дітей матерьскых школ аж по дорослых. Тот рік святкованя Дня Русинів Словакії закінчать ся як раз у віторок 12-го юна концертом під назвов „Русины і Земля співать, в рамках котрого представлять ся русиньскы колектівы і солісты з популарной телевізной шов RTVS. Тот концерт, на котрый буде вступ безплатный, зачне о шестій вечур в просторах Великого штудія Словацького розгласу в Кошыцях.

Фото: TASR