Рештавраторска дільня Словацького народного архіву в Братіславі захранила пошкодженый документ з архіву в Спішскій Новій Всі. Іде о документ баницького братства святой Барборы, котре было актівным од 15. сторочя. “В баницькых містах, як была Спішска Нова Вес, ся баниці здружовали до соціалных здружінь, котры їм потім давало выгоды. Спішска Нова Вес патрила до Провінції 13 спішскых міст і тоты баниці сі свої становы дали списати і підтвердити в року 1613,“ увів то про Пресову аґентуру СР директор Штатного архіву в Кошыцях Ріхард Павловіч. Як далі увів, в документі суть списаны правила, котры выходили з реліґійного, сполоченского і з каждоденного жывота баників. „Членове братства сі за свою патронку і охранкыню зволили святу Барбору. Богослужбы братства ся одбывали в каплиці фарського костола, де святій Барборі выбудовали олтарь і дали го посвятити. Каждый приятый член братства мусів приспіти фунтом воску. Представенство неприяло до братсва нечестного чоловіка а каждого непорядного знова вылучіли. Каждый член братства быв повинный славити свято святой Барборы і сполу с представителями іти на оферу, як так незробив, мусів заплатити покуту три фунты воску,“ цітовала з документу ведуча Архіву Спішска Нова Вес Ніна Палкова.
(TASR)