Председа Пряшівского самосправного краю (ПСК) Мілан Маєрьскый підписав меморандумы о співпраці з трьома стратеґічно-плануючіма реґіонами – Шаріш, Спіш і Вышній Земплін. Пріматоры окресных міст їх підпишуть по тім, што дістануть документ поштов. Інформувала о тім Леа Геілова з Одділіня комунікації і пропаґації ПСК. Обидві стороны собі од того обіцяють менше бюрокрації і веце грошей про реґіоны при черьпаню еврофондів.  Черьпаня еврофондів у реґіонах бы мало быти вдяка новій сістемі схвальованя проєктів простіше, скоріше і ефектівніше. По новому уж не буде о проєктах рішыти Братіслава, але схвальованя буде реалізуване на території краю посередництвом Рады партнерства і Коордіначной рады стратеґічно-плануючіх реґіонів. (ЛЕМ.фм, Пкф)