Словацькый народный музей – Музей русиньской културы в Пряшові на завтра, 6-го марца 2025-го року, рихтує одкрыти Русиньскый книжковый фестівал, в рамках котрого буде мож выслухати лекцію Валерія Падяка. Як за музей інформовала Яна Трущіньска, СНМ – Музей русиньской културы уж традічно в марці організує Русиньскый книжковый фестівал, в рамках котрого презентує новы русиньскы выданя. Тот рік в рамках той події музей припомяне собі і три юбілеї. 6-го марца буде мож в русиньскім музею выслухати лекцію під назвов Русиньскы великаны oчами доц. Мґр. Валерія Падяка, к.н. Падяк зверне увагу на три особности і юбілєї – 190 років од народжіня Анатолія Кралицького, 160 років од смерти Александра Духновіча, і 50 років од смери Олены Мандіч-Шіналі. Джерело фотоґрафії: Facebook/ЛЕМ.ФМ. (ЛЕМ.ФМ, Пкф)