В понедільок 15-го апріля 2024-го року одбыло ся святочне засіданя Акдемічной громады ПУ. В рамках нього удільовала ся і найвысша нагорода універзіты, котров є Золота медайла Пряшіской універзіты. Тоту нагороду ректор універзіты Петер Коня уділив Васильови Ябурови, єдному із двох головных кодіфікаторів русиньского языка на Словакії із 1995-го року. Василь Ябур собі нагороду перевзяв за вызначну научно-педаґоґічну роботу і розвиток Інштітуту русиньского языка і културы Пряшівской універзіты в Пряшові. Василь Ябур має за свою роботу на благо Русинів уж веце нагород. Найвысшов є Прибинів крест ІІІ. класы за вынятковы заслугы о розвиток Словацькой републікы і за заслугы при кодіфікації русиньского языка, котрый му уділила презідентка СР Зузана Чапутова у 2021-ім році.

(Медвідь)