x

Кандідатуру на пріматорку Снины оголосила Ґаландова

00

В слідуючіх комуналных выборах буде на посаду пріматоркы Снины кандідовати і Даніела Ґаландова. Од 2010-го року є депутатков Містьского заступительства в Снині, кандідовала як непартійна. Вже дакілько років діє в области всокочіня русиньскых памяток, причім ся анґажує і в русиньскім русі. На переломі років 2011 і 2012 была співосновательков безпрофітовой орґанізації Карпатьскы деревяны церькви, в котрій має функцію директоркы. Як раз через тоту орґанізацію залучіла ся і до русиньского руху, коли Карпатьскы деревяны церькви стали членом Округлого стола Русинів Словеньска. Кедь русиньска платформа зачала у 2012-ім році робити на документі під назвов Проґрам розвитку русиньской народностной меншыны в Словацькій републіці, Ґаландова была коордінаторков єдной із пятьох частей документу під назов Села і міста.
(Медвідь)