В суботу 4-го мая 2024-го року до Ґрекокатолицького катедралного собору святого Йоана Крестителя пришло множество людей із різных русиньскых реґіонів Словакії вєдно із своїма священиками. Общество святого Йоана Крестителя (ОСЙК) в тот день припомянуло собі 20 років од свого обновліня. Представителі ОСЙК, котрого председом є отець Ярослав Поповець, выбрали якраз тот день на пропозіцію Высокопреосвященого Йоны, пряшівского архієпіскопа і митрополіты, котрый прияв запрошіня і хотів взяти особно участь на тім торжестві. На свякованю округлого юбілея брали участь і представителі русиньскых інштітуцій і орґанізацій. По привітаню вшыткых наслідовала торжественна Божеска літурґія святого Йоана Златоустого, котрой головным служытельом быв Высокопреосвященый Йона. Торжественна літурґія была в  церьковнославяньскім языку з русиньскыма частями, котру збогатив і спів Камюнчанів. По літурґії приговорили ся і честны гості юбілея, котры акцентовали велику роботу Общества святого Йоана Крестителя про русиньскых ґрекокатоликів, великый вклад до того, же русиньскый язык вдяка їх жертвенному і Богом благословленому ділу став і языком хоснованым почас богослужінь. На кінцю приговорив ся отець Ярослав Поповець, председа общества, якый закінчів свій приговор переданьом Памятной плакеты кір Йонови. Председа Русиньской оброды на Словеньску Мартін Караш почас свого приговору якраз до рук отця Поповця дав дяковну грамоту про ОСЙК од РОС. Проґрам продовжовав у єпіскопскій резіденції, де окрім іншого отці Ясик і Поповець продовжали в передаваню Памятных плакет за поміч і підпору Общества святого Йоана Крестителя. В Пряшові было нагородженых 26 особ. Офіціалный проґрам закінчів ся благословліньом Преосвященого Йоны і заспіваньом многолітсвія Хрістос воскресе. Общество святого Йоана Крестителя з нагоды 20-го юбілею свого обновліня выдало і брожуру, в котрій є сумарізація той двадцятьрічной роботы.  Джерело фотоґрафії: Facebook/ЛЕМ.ФМ. (ЛЕМ.ФМ, Пкф)