Як інформовало місто Меджілабірці на своїм офіціалнім сайті на сіті Facebook, дня 14-го новембра 2025-го року в Заґужі одбыла ся стріча польско-словацькых представителів турістічного руху і културы в рамках партнерьского проєкту під назвов Черезгранічне подорожіня в часі із віртуалным монахом, котрый є фінанцованый із проґраму Interreg Польща – Словакія 2021 – 2027. Цільом стрічі было підпорити розвиток черезгранічных інтеґрованых турістічных понук, посилнити роль културы і турістічного руху в економічнім розвитку теріторії, і помочі ку соціалній інклузії. В рамках проґраму занимали ся резултатами дотеперішніх проєктів Interreg Польща – Словакія, і тым, як новы атракції збогачують понуку реґіону. Як далше інформовало місто Меджілабірці, єднов із рихтованых новот є цілорічна експозіція із голоґрамом монаха, іншталована внутрі Центра културы Foresterium, де подія і проходила. Тота стріча мала і далшый важный пункт, котрым было підписаня взаємного Договору о співпраці, якый іщі веце укріплять довгорічне партнерство меджі польскыма і словацьмыа субєктами. Джерело фотоґрафії: ЛЕМ.ФМ/Фацебоок (LEM.FM, Пкф)