Попрадьскый аквапарк чекать на будучій рік велика реконштрукція. Пресовій аґентурі TASR то потвердив діректор компанії Aquapark Poprad, s. r. o., Ріхард Піхонскый з тым, же суть істы части заряджіня, котры превадзкують уж од 2004-го року, і тоты потребують модернізацію. „Выпрацювали сьме проєктову документацію, дали сьме жадость о ставебне поволіня, котре нам было призначене кінцьом минулого рока, і єдночасно сьме пожадали о фінанцованя нашы партнерскы банкы. Уверы нам одобрили і вірю, же в 2020-ім року зачнеме з ґенералнов реконштрукціов самого аквапарку,“ повів Піхонскый. Єдночасно додав, же роботы собі выжадають скоро сім міліонів евр, причім кошты хоче компанія градити з властных і уверовых джерел. Веджіня аквапарку вірить, же по реконштрукції ся знова звышить конкуренціяспособность заряджіня і стане ся лідром на торгу. (TASR, Pkf)